沉澱咗大半年，幾乎停咗update究竟咩原因？
其實呢段期間我碌fb ig嘅頻率比以前多好多（可能得閒咗），其中一個原因係好想了解更多香港會點，我能做到嘅又係啲乜？！
由社會運動到疫情，勇於表態嘅人有好多，有幾多真心，有幾多為利益？我認識嘅人當中不乏生意人及演藝事業嘅人。眼見一個又一個為生意加入藍營希望托展業務進軍國內嘅一群，遇到黃色經濟圈嘅人龍懲罰，突然勇悍起嚟，感到黃色=黃金，只要黃到金就有黃金，不惜聲淚俱下做訪問，不得不讚嘆👏🏻👏🏻呢一類人可以去做偽人。你哋同我做咗7年寵物節目遇到嘅動物組織同義工差無幾，為咗爭隻喺街受重傷嘅動物可以有幾班人去爭，為嘅係喺呢隻受傷嘅毛孩身上可以幫佢哋籌到幾多錢，爭唔到嘅分分鐘又唔知喺邊搵隻毛孩整傷佢影相放上網又搵返筆。
另一撮人，平日只希望喺自己fb ig 有更多followers 有朝一日成為真正搵到食嘅KOL，發現表態有著數，會有新一代嘅人like及撐，刻意出呢類型嘅Post吸引吓人，怎至有啲平時報紙新聞都唔多聽唔多睇，突然成為咗林鄭個腦，講到知道特首諗緊乜，下一步係點，其實真係好好笑。我差啲想教佢哋不如開個話有口罩賣嘅page，咁咪一窩蜂有上萬up嘅followers囉，過一排改過個名，咁就攪掂。
不過有啲叻仔叻女食到條水俾佢爆出個價值，吸到人流吸到金成功咗，自然唔會將真相講出嚟啦。
撐乜都好！有好多種方法，唔一定要開聲話俾人聽，咁鐘意講，唔好講就聲大大，到有機會做就龜縮。
我一向講嘢直，好多認識我嘅人都好清楚，不平則鳴，係好係壞？！見仁見智。但我亦好明白要生存應該圓滑啲會比較好，我做唔出小滑頭，所以我曾經選擇忍耐，對唔值得嘅人唔需要動氣，做自己應該做嘅事就足夠喇，但原來你唔理世事，啲小人都會攪你。
其實我已經好習慣，我信命，我15歲開始每個師傅都話我是非命。廿年喇！我已練得一身好量度。
本命年嘅中女冇無謂嘅時間去應酬太多人，
有事鍾無艷 無事夏迎春嘅 ，唔該！行開！做人要飲水思源啊！
人真係會物以類聚，咩人會識返啲咩人，小圈子嘅繼續吧，不要惹我。
我會做返唔會理人點睇，意志力好強嘅 阿Lu 何嘉露 ，就係咁簡單，多謝身邊有好多錫我嘅人讓我變得更強大，謝。
btw祝願全球疫情可以盡快消失，齊齊做個更強的人，自己香港自己救。
#同熱愛這片土地大家刻骨銘記愁或喜生與死也是香港地 #做人三好 #做好事 #說好話 #存好心
Search